စောကျော်လေး: အာဏာရှင်စစ်အစိုးရက တိုင်းရင်းသားအပစ်ရပ်အဖွဲ့တို့အား ဖဲ့ထုတ်ဖြိုခွဲနေကြောင်းလေ့လာသူများက ပြောကြား

ပြည်သူတွေကို ပြန်သတ်နေတဲ့ အာဏာရှင်စစ်အစိုးရက နယ်ခြားစောင့်တပ်အသွင်ပြောင်းရေး ငြင်းဆန်နေသည့် အင်အားကြီး အပစ်ရပ်တိုင်းရင်းသားအဖွဲ့တို့အား စစ်ရေးဖိအားပေး တိုက်ခိုက်ခြင်းထက် အဖွဲ့အတွင်း အင်အားပြိုကွဲစေရန် ဖဲ့ထုတ်စည်းရုံးသည့်နည်းကို မြန်မာစစ်အစိုးရက ကျင့်သုံးနေကြောင်း စစ်ရေးလေ့လာသူများက ပြောကြားသည်။“

အခု ကေအိုင်အို ကချင်အဖွဲ့က နောက်ဆုံး တောင်းဆိုချက်အနေနဲ့ သူတို့တောင်းထားတဲ့ အခွင့်အရေးတွေအတိုင်း နအဖဘက်က လိုက်လျောပေးမယ်ဆိုရင် နယ်ခြားစောင့်တပ်တောင်မကဘူး၊ လက်နက်ဖြုတ်သိမ်းရရင်လည်း သူတို့ဘက်က လိုက်လျောပေးမယ်လို့ အောက်တိုဘာ လဆန်းပိုင်းကတည်းက အကြောင်းပြန်ထားတယ်။ အဲဒါကို နအဖဘက်က ပြန်ငြိမ်သွားပြီး ကေအိုင်အိုက ခေါင်းဆောင်တချို့ကို ခိုးတွေ့ပြီး စည်းရုံးတာတွေ လုပ်နေတယ်” ဟု ကချင်သတင်းအေဂျင်စီ အယ်ဒီတာ ကိုနော်ဒင်က ပြောသည်။

ကေအိုင်အိုဌာနချုပ်နှင့် အလှမ်းဝေးနေသည့် ရှမ်းပြည်နယ်မြောက်ပိုင်းမှ ကေအိုင်အို တပ်မဟာ(၄) ကိုလည်း စစ်အစိုးရက နယ်ခြားစောင့်တပ်ဖွဲ့စည်းရန် ပိုမိုဖိအားပေးမှုများ ရှိနေပြီး တပ်မဟာ (၄) အား တိုက်ခိုက်လာပါက ကေအိုင်အိုတဖွဲ့လုံးကို စစ်ကြေညာခြင်းပင် ဖြစ်သည်ဟု ကေအိုင်အိုက တုံ့ပြန်ထားကြောင်း ကိုနော်ဒင်က ပြောသည်။

နယ်ခြားစောင့်တပ် အသွင်ပြောင်းရေးနှင့် ပတ်သက်၍ အပစ်ရပ်အဖွဲ့အချို့အား ယခုလ အောက်တိုဘာ နောက်ဆုံးအပတ်တွင် အကြောင်းပြန်ကြားရမည်ဟု စစ်အစိုးရက ဖိအားပေးထားသည်။အမျိုးသားရေးစိတ်ဓာတ်ဖြင့် ဆယ်စုနှစ်ပေါင်းများစွာ ရင်ဆိုင်တိုက်ပွဲဝင်လာခဲ့သည့်

တိုင်းရင်းသားအဖွဲ့အစည်းတို့အား မြန်မာစစ်အစိုးရအနေနှင့် စစ်ရေးဖိအားဖြင့် တိုက်ခိုက်အောင်ပွဲခံခြင်းသည် ယာယီသာဖြစ်နိုင်ကြောင်း တရုတ်-မြန်မာနယ်စပ် စစ်ရေးလေ့လာသူ ဦးအောင်ကျော်ဇောက သုံးသပ်သည်။“တကယ်လို့ နအဖက ဖိအားပေးပြီး တိုက်လို့ရှိရင်လည်း သူယာယီပဲ ရနိုင်မယ်။ အမျိုးသားပြဿနာဟာ ဘယ်တော့မှ မငြိမ်းသွားဘူး။ ဒီနေ့ ကေအိုင်အို မရှိတော့ဘူးဆိုရင် နောက်နေ့မှာ ကေအိုင်အို အသစ်တမျိုး ထွက်လာမှာပဲ။ ယူဒဗလျူအက်စ်အေက ဘယ်လိုမှ တိုက်မနိုင်လို့ အပ်လိုက်ရရင်လည်း နောက်ဝတပ်ဖွဲ့တဖွဲ့ ပေါ်လာမှာပဲ။ ဒါမုချ ဖြစ်တယ်” ဟု ဦးအောင်ကျော်ဇောက ခေတ်ပြိုင်သို့ ပြောကြားခဲ့သည်။အပစ်ရပ်အဖွဲ့မှ အင်အားအကြီးဆုံး ဝတပ်ဖွဲ့က ၎င်းတို့၏ ရပ်တည်ချက်အဖြစ် မြန်မာစစ်အစိုးရနှင့် ရရှိထားပြီးသား ငြိမ်းချမ်းရေးမပျောက်ပျက်အောင် ထိန်းသိမ်းသွားရန်၊ ပြည်သူတို့၏ လုံခြုံရေးနှင့် ကောင်းစားရေးအတွက် ကိုယ်စွမ်းဉာဏ်စွမ်း ရှိသမျှ ဖြည့်ဆည်းသွားရန်နှင့် စစ်အစိုးရအပါအဝင် မည်သည့်အဖွဲ့အစည်းနှင့်မဆို မိတ်ဆွေအဖြစ် သတ်မှတ်ပြီး မိမိတို့ဘက်မှ စတင်ကျူးကျော်တိုက်ခိုက်ခြင်းမျိုး ပြုလုပ်မည် မဟုတ်သကဲ့သို့ မိမိတို့နယ်မြေသို့ ကျူးကျော်တိုက်ခိုက်လာပါက အပြည့်အဝ ကာကွယ်သွားရန် အချက် (၃) ချက်ကို စွဲကိုင်ထားကြောင်း ဝတပ်ဖွဲ့နှင့် နီးစပ်သူ မန်းအိုက်ဖုံးက ပြောသည်။

၎င်းက “ကိုးကန့်တို့၊ ပလောင်တို့ကို လက်နက်အတင်းဖြုတ်သိမ်းသလို ဝကို သွားလုပ်လို့မှ မလွယ်တာ။

ဝကို စစ်ရေးအရ ကျူးကျော်တိုက်ခိုက်ရင်လည်း အခြားအပစ်ရပ်အဖွဲ့တွေကိုပါ နအဖက စစ်ကြေညာသလို ဖြစ်သွားလိမ့်မယ်။ နအဖကို ပြန်တိုက်ဖို့ ဝမှာ အင်အားအလုံအလောက် ရှိတယ်လေ” ဟု ပြောသည်။အပစ်ရပ်အဖွဲ့အစည်းများနှင့် ငြိမ်းချမ်းရေး ဆက်လက်တည်မြဲရေးသည် နအဖစစ်အစိုးရအပေါ်တွင်သာ မူတည်နေကြောင်း မန်းအိုက်ဖုံးက ဆက်လက်ပြောကြားသည်။“နအဖက ဝတပ်ဖွဲ့ရဲ့ အတွင်းရေးကို ဖဲ့ဖို့မလွယ်ဘူး။ Leadership အပိုင်းမှာ ဝက အခြားအဖွဲ့တွေထက်စာရင် ပိုပြီးခိုင်မာတယ်။ မွန်ပြည်သစ်အတွက်တော့ ပိုသတိထားရမယ်လေ။

စစ်အာဏာရှင်အစိုရ နအဖဆိုတာက လူတယောက်ကိုတောင်မှ နှစ်ပိုင်းပိုင်းလို့ရရင် ပိုင်းဖို့ ကြိုးစားမှာပဲ။ တယောက်နဲ့တယောက် ယုံကြည်မှု ပျက်ပြားလာအောင် လုပ်မယ်။ ဒါက စစ်ရေးထက် ပိုထိရောက်မှန်းလည်း နအဖက သိထားတယ်” ဟု ၎င်းက ပြောသည်။နယ်ခြားစောင့်တပ် လက်မခံသည့် အင်အားကြီးအဖွဲ့များမှာ ၀ပြည်သွေးစည်းညီညွတ်ရေးတပ်မတော် (ယူဒဗလျူအက်စ်အေ)၊ ကေအိုင်အို၊ မိုင်းလားအဖွဲ့ (အန်ဒီအေအေ)၊ မွန်ပြည်သစ်ပါတီတို့ ပါဝင်ပြီး

တပ်အသွင်ပြောင်းရေး သဘောတူချက် ရရှိထားပြီးအဖွဲ့များမှာ တိုးတက်သောဗုဒ္ဓဘာသာကရင်အမျိုးသားတပ်မတော် (ဒီကေဘီအေ)၊ ကရင်နီပြည် လူမျိုးပေါင်းစုံ ပြည်သူ့လွတ်မြောက်ရေးတပ်ဦး (ကလလတ)၊ ကချင်ပြည်ဒီမိုကရေစီသစ်တပ်မတော် (အန်ဒီအေ-ကေ) နှင့် အင်အားအနည်းအကျဉ်းရှိသည့် အခြားလက်နက်ချ (သို့မဟုတ်) အပစ်ရပ်အဖွဲ့တို့ ဖြစ်ကြသည်။